కళ్ళు మౌన భావాల లోగిల్లు

శ్రీనివాస్ రెడ్డి, ఎం.ఏ (ఎం.ఫిల్),
హైదరాబాదు విశ్వవిద్యాలయం.

కళ్ళు
మౌనభావాల లోగిల్లు
సుమధురస్వప్నాలకు పొదరిల్లులు
రంగురంగుల లోకాన్ని
తమలో యిముడ్చుకున్న హరివిల్లులు
సౌందర్యాన్ని సుతిమెత్తగా
స్పృశించే చిరుజల్లులు

కళ్ళు
మౌన భావాల లోగిల్లు
కానీ వీక్షణం తీక్షణమైతే
వాటి రూపం వడగల్లు.

కళ్ళు చిన్నవే కావచ్చు
అయినా అవి ప్రపంచాన్ని సైతం
తమలో బంధిస్తాయి
తమ రెప్పలను కదిలిస్తూ
చిరునవ్వులు చిందిస్తాయి.

ప్రకృతిలోని పచ్చదనాన్ని
ప్రభాతపు తొలికిరణాన్ని
పడుచు పిల్ల పరువాన్ని
శరత్కాళ చంద్రికను
ఆస్వాదిస్తూ ఉండాలని
కళ్ళకు ఆశ.

కళ్ళు మాట్లాడతాయి.
మౌనం వాటి భాష.
చిన్నవైన కళ్ళల్లో
సింధువంత భావాల్నీ
మౌన సరాగాల్నీ పలికిస్తాయి..

కనుమరుగైన నేస్తాన్ని కలుసుకోవాలంటే
ఒక్క క్షణం కళ్ళు మూసుకుంటే చాలు
ఆ రూపం కళ్ళలో ప్రత్యక్షమౌతుంది.
అందుకనే కళ్ళు
ఊహల్ని ఫీడ్ చేసుకునే కంప్యూటర్లు.