భరతమాత

అండెం శ్రీనివాస్ రెడ్డి,
హైదరాబాదు విశ్వవిద్యాలయం.

సీ: పరదేశ సంస్కృతుల్ పసి మొగ్గవలె నుండ 
             పువ్వువైతివి నీవు పుట్టగానె 
     గంగవాణి సిందుత్తుంగ తరంగాన
             తొంగి చూస్తివి నీవు తొల్లినాట 
     అజ్ఞాన తామసిన్ అణచివేస్తివి నీవు
             వేదకిరణముల వెలికి తీసి
     శాంతి అహింసల సందేశములనిచ్చి
             జీవితం కర్థము చెప్పినావు

ఆ.వె: ధీర వీర శూర తేజోవిరాజుల
        గన్న నీ చరితము కలికితమ్ము
        విశ్వమదిరి పడగ వేనోళ్ళ పొగడెద
        బహువిధముగ నిన్ను భరతమాత

సీ: మంచు కొండయు నీకు మణికిరీటముగాను
            భాసించె శిరమున భరతమాత
     మణికిరీటపు కాంతి మహాసాగరమైన
            సింధు నదిగమారి సిందులేసె
     గంగయమున నదుల్ కంఠాభరణముగ
            మెడలో జిగెల్ మని మెరయుచుండె
     భాసించె నడుమున వడ్డాణమువలెను
            తపతి మహానర్మదాది నదులు

తే.గీ: తుంగ గోదారి కృష్ణలుత్తుంగ యలలు
       పాదములకును యందెలై పాటపాడె
       పెన్న కావేరి నదులేమొ మెల్లగాను
       కడిగి వెళ్ళుచునుండెను కాళ్ళధూళి